പുകയുന്ന സ്വപ്നങ്ങൾ, ഒഴുകുന്ന കണ്ണുനീർ

ഇരുളിൻ മറവിൽ പുകച്ചുരുൾ തേടി-

മറഞ്ഞുപോകുന്നൂ പ്രിയ കൗമാരം,

ലഹരിതൻ മാസ്മര ചതിക്കുഴിക്കുള്ളിൽ-

അടിപതറുന്നൂ നവ യൗവനം.

​കൈപിടിച്ചുയർത്താൻ വെമ്പിയ കൈകൾ-

കഞ്ചാവിൻ ഗന്ധത്തിൽ മുങ്ങിനിൽപ്പൂ,

അമ്മിഞ്ഞപ്പാലിൻ അമൃതു നുകർന്നോർ-

മദിരതൻ കൈപ്പിൽ മയങ്ങിനിൽപ്പൂ.

​പെണ്ണും ലഹരിയും നേരമ്പോക്കെന്നോർത്ത്-

സ്വന്തം കരുത്തിനെ കാറ്റിൽ പറത്തി,

നേർവഴി കാട്ടേണ്ട മിഴികളിലന്ന്-

കാമത്തിൻ കറുപ്പിൻ പടലം വിരിച്ചു.

​പെറ്റുപോറ്റിയ ആ തണൽവൃക്ഷങ്ങൾ-

ചുട്ടുപൊള്ളുന്ന തപസ്സിലാണിന്ന്,

തോരാത്ത കണ്മുന നീരൊഴുക്കി-

ജീവിതഭാരവും പേറി നിൽപ്പു.

​മകനേ... മകളേ... നിൻ കാലൊച്ച കേൾക്കാൻ-

രാവേറെ കാത്തിരുന്നാ വയോധികർ,

കണ്ണടയ്ക്കുമ്പോഴും ഉള്ളിൽ വിങ്ങുന്നൂ-

നീ പോയ വഴികളിലെ ചോരപ്പാടുകൾ.

​ഒരു മാത്ര ചിന്തിക്കൂ വഴിതെറ്റും മുൻപേ-

നിന്റെ വേരുകൾ നിൻ അച്ഛനും അമ്മയും,

കരിനിഴൽ വീണൊരാ താഴ്വര വിട്ടു നീ-

വെളിച്ചത്തിൻ ലോകത്തേക്ക് മടങ്ങി വരിക.

എസ്സ്.എസ്സ്. ലാൽ ( എസ്സ്. എച്ച്. ഹോട്ട്ന്യൂസ് )